استاد هوشنگ جعفری دن
اغ اتیم ، قول قاناتیم،
ات قدمین یورتما یئری!
اش تپه لردن
سیلدیریم تک سره لردن
سئله سینمیش دره لردن
بو نه طوفاندی گوزل کهلیگیمی ایستیر اییرسین فره لردن
غیرتیم جوشه گلیر غملی خبردن
اغ اتیم – قورخما خطردن!
اغ اتیم ، قول قاناتیم
شیهه چک، قوی سسیوه
بلکه یاتانلاردا اویانسین
یاتماغین واختی دگیل دورسون اوتانسین
یاتانین عومرو تالانسین
تازا نعلین وار اتیم
چال بو داغین سینه سینه ، قوی پارالانسین
چال داغین سینه سی باتسین ، یارالانسین
داشی داش دان ارالانسین
اغ اتین ، قول قاناتیم
داش قایادان اشما چتیندی
قاباق اوز یوققوشادی، قاشما چتیندی
داغا دیرماشما چتیندی
داشا ، سووخاشما چتیندی
باخما یوللاری چتیندی ، اورانین هیبتی یوخدور
اغ اتیم همت ائله !
غیرتی یوخدور
هله اوز یوققوشالار چوخدو قاباقدا
اشماق اولماز بو ایاقدا
اغ اتیم قول قاناتیم
بسدی ایاق ساخلاما، گون باتی قارالدی
گون گئچیب داغ دالینا رنگی سارالدی
داغین اوستون دومان الدی
اغ اتیم بس بو نه حالدی؟
بورا یارقاندی اتیم دورما اماندی ...
اغ اتیم ، قول قاناتیم
ات قدم ایدینلیغا ساری
هورکوشن اوولاریلان چیخ سره یاللاری یوخاری
قار قالان داغلارا سال بیر نفسین
قوی اریسین بوز کیمی چئگنینده کی قاری
سولاری ارخالارا سال بلکه سووارسین
قوری قالمیش مومالاری
قوی بویوک گولده اوزوشسونله یاشیل باش سونالاری
اغ اتین
جهد ائله باری
سنی تاری!
اغ اتیم ، قل قاناتیم
طبعیمین دریاسی جوشقوندو
یئل اسدیر لپه لنسین
قوی چالیم صخره لره دالغامی ، دالغام سپه لنسین
قوی یاغیش تک قورویان
داغلارین اوستونده اله نسین
هرزه اوتلاری اپارسین
لالا بیتسین
هامی گوللر تزه لنسین
گولو بلبل یییه لنسین
اغ اتیم ، قول قاناتیم
ات قدمین قلعه ی بابکدن اشاق
قارا گونلن ساواشاق
ات گولوندن سس اتیب ، بابکین حالین سوروشاق
یئنه طوفاندا جوشاق
دریالار تک قوووشاق
قوووشوقدان سوووشاق
اغ اتیم، قول قاناتیم
شیهه چک قوی سسیوه
هاجرینی ترکینه چکسین نبی گلسین
قوی کور اوغلو اتینی داغلارا سالسین
ائشیدیب شیهه نی گلسین
الده کسگین قیلیجیلا
بویاسین قانه کئچل حمزه نی گلسین
قوی کرم سازینی سالسین دوشونه ، چوللره دوشسون
های سسی ائللره دوشسون
دئگیلن غملی کرم ایستیر اگر ، اصلینی گلسین
دشمنین تا کی کسک نسلینی ، گلسین
قوی بو داغلاردا بویوک هلهله دوشسون
داغلارا ولوله دوشسون!
اغ اتیم قول قاناتیم
منه بیر قالغی بابامدان ، بو ورندیلدی ، بونو چئگنیمه ساللام
قارا داغ باشینی اللام
اورا بیر ولوله ساللام
اغ اتیم دورما ، یوبانسان ، دالی قاللام
اغ اتیم ، قول قاناتیم
بیز اگر قلعه ی سیمرغدان اشساق بیزه ازدی
باخما یوللار ناتارازدی
باخما بو قارلی دماوند ، بو قفقاز بو هرازدی
باخما داغدا هاوا دوتقوندو – ایازدی
اغ اتیم ات قدمین دریا ، دایازدی
دریانی گئچسن اگر شهر نیازدی
اوردا هر قان کی توکولدو یئره، ازادلیغی یازدی
بشر ازادلیغا بازدی !
اغ اتیم ، قول قاناتیم
اوردا دولبرچین اوتو دورت پر اچیبدی
اوردا دیل تازه شیرین دیللر اچیبدی
اوردا باغلاردا بوتون گول لر اچیبدی
اغ اتیم
ات قدم
ایدینلیغا ساری !