تورک خانئم شاعر
:: ملیحه عزیزپور
1
بورا ات بازاری!
کیمیسی گؤز
کیمیسی دیل
کیمیسی بئیین
کیمیسی بویون
کیمیسی قورساق…
و، آیریجا
نئچه باتمان کیمیلری
باها - باها دؤشهنیبلر تاباقلارا…
بورا ات بازاری!
اؤزلوک اوجوزلوغو
آلانا میننت…
2
داها چیلدیرمیشام نانای نای…!
ایندی منیم او یئریمدیر
دونیانی تپ - چئویر ائدم.
نه اولاجاق
منی توتوب آساجاقلار
یا، جانیمی آلاجاقلار؟!
باخ… ایندیجه
صداقتی سویا قاتیب ایچهجهيم
حقیقتی بللهلهیيب یئیهجهيم.
نه وئجیمه
بوغازیمدامی قالاجاق
یوخسا، ککلیيیم آزاجاق؟!
داها چیلدیرمیشام نانای… نای…!
الیمی، لاپ اوجا یئره قویموشام
دلیلیيیمین، سون نوقتاسینی قویموشام
بو قونونو، صاف ویجداندان دویموشام:
" یاشام، چاپیب - چاپیلماقدادیر
چاپماسان، چاپیلاجاقسان " …
چیلدیرمیشام داها،
نانای… نای…
3
او، لئیلی کیمی - شیرین کیمی بیر گؤزلدیر!
یئریشی ککلیک
دوروشو توووز
گولوشو روز گولو تکدیر.
هله،
عیشوهسینی - نازینی گؤرهسن!!!
***
باغیشلایین آغا!
روزونوزون مارکاسی ندیر؟!
4
بو اوچونجو چایدی
سوزورم سنه.
بو دا سویویاجاق بیلیرم
گلمهیهجکسن
***
ندن گؤرنده سنی
کیریخیرام
دوغوردان؟!
***
بو اوچونجو چایدی
سوزمهيیم گلمیر اؤزومه
بو دا سویویاجاق
گلمهيهجکسن
بیلیرم…